Новости / Политика

Экс-спікер Вярхоўнага Савета Мечыслаў Грыб у Баранавічах сустрэўся з гарадскімі актывістамі

29.09.2015, 14:39 / remove_red_eye 114 / chat_bubble

Грамадскія слуханні па праграме партнёрства “Народны рэферэндум”, якія тычацца абмежавання колькасці тэрмінаў знаходжання на пасадзе прэзідэнта Беларусі, прайшлі 26 верасня ў Баранавічах.

Адно з пытанняў “Народнага рэферэндуму” гучыць так: “Ці згодныя вы, што адна і тая ж асоба не можа займаць пасаду прэзідэнта больш за два тэрміны?” Менавіта пра гэта і ішла гаворка на сустрэчы ў Баранавічах, у якой узялі ўдзел першы намеснік старшыні БСДП, былы спікер Вярхоўнага Савета Беларусі Мечыслаў Грыб, намеснік старшыні руху “За свабоду” Юрась Губарэвіч і магістр паліталогіі, аналітык Алесь Лагвінец. Нагадаем, што пад старшынствам Мечыслава Грыба 15 сакавіка 1994 года была прынята Канстытуцыя Беларусі, якая замацавала ў нашай краіне пасаду прэзідэнта.

– Тых, хто незадаволены сённяшняй сітуацыяй у краіне, становіцца ўсё болей, – выказаў сваё меркаванне ў пачатку сустрэчы Юрась Губарэвіч. – Улада не спраўляецца з сваімі абавязкамі, не жадае прыслухоўвацца да грамадства, не чуе яго.

Мечыслаў Грыб у сваім выступе падкрэсліў, што ў 1994 годзе Канстытуцыя прайшла ўсе ўзгадненні, у тым ліку і на ўзроўні Венецыянскай канвенцыі, і адпавядала ўсім патрабаванням дэмакратычнай дзяржавы. Па яго словах, там адназначна было прапісана, што прэзідэнт можа абірацца не больш як на два тэрміны. Былы старшыня Вярхоўнага Савета прыгадаў, што пазней у беларускую Канстытуцыю былі ўнесеныя змены, якія знялі абмежаванні колькасці тэрмінаў на пасадзе прэзідэнта.

РЕКЛАМА

Мечыслаў Грыб лічыць, што цяпер ніхто з чыноўнікаў у Канстытуцыю не заглядае, а жывуць яны па дырэктывах і ўказах. Хаця ўсё заканадаўства павінна падпарадкоўвацца менавіта Канстытуцыі.

Былы старшыня Вярхоўнага Савета адзначыў, што і падлік галасоў падчас выбараў павінен праводзіцца ў Беларусі не так, як цяпер.

– Трэба не закрываць стол з бюлетэнямі ад назіральнікаў спінамі членаў камісіі, а паказваць усім кожны бюлетэнь асобна і класці ў адпаведны стос, – тлумачыць ён.

На думку аналітыка Алеся Лагвінца, цяпер палітычныя рашэнні «прымаюцца адарвана ад людзей».

– Што тычыцца парламента, то найперш гэта месца для дыскусій. А ў нас у парламенце нават фракцый няма! Створаны эфект халадзільніка, і ўсе мы жывём у замарожаным стане, – адзначыў Алесь Лагвінец.

На яго думку, грамадскім актывістам сёння трэба плённа працаваць, найперш у галіне адукацыі, пашырэння ведаў, захавання гістарычнай памяці.

Падчас мерапрыемства госці адказалі на шматлікія пытанні жыхароў горада, якіх прыйшло каля трыццаці чалавек.

Читать также
Комментарии

Правила комментирования

comments powered by Disqus
Scroll Up