Новости / Происшествия

Загадчык Баранавіцкай стаматалагічнай паліклінікі «замініраваў» сваю ж установу

28.03.2014, 14:31  / remove_red_eye 238   / chat_bubble0

Ні з кім не ўзгодненыя вучэнні выклікалі пярэпалах і прыезд міліцыі.

27 сакавіка вуліцу Міцкевіча ў Баранавічах перакрылі міліцыянеры – агульны пярэпалах выклікала бомба, якую быццам бы знайшлі ў стаматалагічнай паліклініцы. Аднак на гэты раз «размініраванне» абышлося без сабак і сапёраў: бутафорскую бомбу ў будынак падклаў загадчык установы Анатоль Ціхно.

– Мы самі вырашылі правесці раніцай вучэнні, ні з кім іх не ўзгаднялі, – патлумачыў “ІР” загадчык. – Хацелі праверыць супрацоўнікаў, адпрацаваць дзеянні ў пазаштатных сітуацыях. Але персанал, як высветлілася, значна больш пільны, чым я раней думаў.

Сама «бомба» ўяўляла сабою каляровы пакет з каробкаю, якая нагадвала на знешнім выглядзе сапраўдную выбухную прыладу. Ніякіх небяспечных рэчываў, вядома, там не было.

 
Па плане, заўважыўшы імправізаваную бомбу, супрацоўнікі павінны былі паведаміць аб ёй дырэкцыі. Але адна з санітарак, звярнуўшы ўвагу на падазроную торбу, не губляючы і секунды, сама выклікала міліцыю. Такі працяг вучэнняў збянтэжыў і кіраўніцтва паліклінікі, і прыбыўшых міліцыянераў:

– Прыехалі надзвычайныя службы, вуліцу перакрылі. Але мы ім усё патлумачылі, і ў агульным замінка ў працы склала прыблізна паўгадзіны – у пачатку восьмай гадзіны мы ўжо працавалі ў звычайным рэжыме, – распавёў загадчык паліклінікі.

Гэта першыя вучэнні, якія дырэкцыя паліклінікі вырашыла правесці самастойна.

– Тут і мы самі недаглядзелі, – са шкадаваннем кажа Анатоль Ціхно, – але, з другога боку, гэта і добры досвед для супрацоўнікаў – будуць ведаць, як сябе паводзіць.

Як запэўнівае загадчык паліклінікі, пільная супрацоўніца будзе ўзнагароджана. Вось толькі самаму Анатолю Ціхно, хутчэй за ўсё, давядзецца адказваць за сваю самадзейнасць.

Поделиться:
Комментарии

Правила комментирования

Подписаться
Уведомление о
0 Комментарий
Ответы по тексту
Посмотреть все комментарии
Scroll Up