Новости / Культура

У гарадской бібліятэцы адбылася вечарына ў памяць баранавіцкіх паэтаў

28.03.2014, 11:06 / remove_red_eye 142 / chat_bubble

Мерапрыемства ў гонар Фёдара Буцько, Генадзя Гапановіча і Яна Савіцкага (Збажыны) прайшло 27 сакавіка.

Так атрымалася, што ўсе гэтыя паэты нарадзіліся ў сакавіку. Усе трое пакінулі пасля сябе літаратурную спадчыну, у кожнага з іх сёлета быў бы юбілей – 100-годдзе з дня нараджэння Фёдара Буцько, 75-годдзе Генадзя Гапановіча і 50-годдзе Яна Збажыны. У кожнага з гэтых аўтараў свой лёс.

Фёдар Герасімавіч Буцько пражыў доўгае жыццё, партызаніў, трапіў у лапы гітлераўцаў, яго расстрэльвалі. Але ўдалося выжыць, ваяваў на фронце, пасля шмат год аддаў адукацыі. І вершы яго ў большасці – пра цяжкія гады вайны, пра Айчыну.

Генадзь Гапановіч вялікі ўнёсак паспеў зрабіць у Баранавічах ў галіне культуры. Імпрэзы з яго ўдзелам і пад патранажам, як кіраўніка музычна-літаратурнай гасцёўні “Крыніца”, збіралі цэлыя залы, пасля яго засталося шмат песень пра наш горад. Дзякуючы Гапановічу, прыхільнікі паэзіі змаглі сустрэцца і паслухаць такога выбітнага аўтара, як Ніл Гілевіч, іншых знакамітых людзей краіны.

РЕКЛАМА

Ян Збажына пайшоў з жыцця рана – яму было толькі 47 год. Ён быў гісторыкам і філосафам. Ён пакінуў нам цудоўныя вершы, якія друкаваліся ў перыёдыцы, выйшлі ў адзінай прыжыццёвай кніжцы творцы “Пыл саркафагаў”, што пабачыла свет у 2004 годзе. Яго санеты, трыялеты, хоку і цяпер з задавальненнем чытаюць прыхільнікі паэзіі.

Пра ўсё гэта і ўспомнілі падчас імпрэзы сябры і паплечнікі паэтаў. Супрацоўнікі бібліятэкі падрыхтавалі да мерапрыемства слайд-фільм, чыталі вершы юбіляраў. Пра сваё сяброўства з Янам Збажыной, пра тое, як арганізоўвалі ў Баранавічах скаўцкі рух, расказаў прысутным Алесь Бакач. Падчас мерапрыемства было паказана відэа, знятае Бакачом пра Яна Савіцкага ў Завоссі.

Творы Збажыны гучалі і ў выкананні Уладзіміра Гундара, які макетаваў кнігу аўтара і ўдзельнічаў разам з Савіцкім у 90-я гады ў адраджэнскім руху. Сваімі ўспамінамі пра творцаў падзяліўся і Валерый Палікарпаў. Вершы, прысвечаныя Генадзю Гапановічу, чыталі Людміла Шувалава, Раіса Раманчук, Алесь Корнеў. Гучалі ў зале і песні на словы аўтара. Пра жыццёвы шлях Генадзя Гапановіча расказала яго жонка Алена.

Прысутныя ўшанавалі памяць баранавіцкіх літаратараў хвілінай маўчання.

Читать также
Комментарии

Правила комментирования

comments powered by Disqus
Scroll Up