Мясцовыя выбары адбудуцца 23 сакавіка 2014 года

Мясцовыя выбары прызначаны на 23 сакавіка 2014 года. Указ № 557 «Аб прызначэнні выбараў у мясцовыя саветы дэпутатаў Рэспублікі Беларусь дваццаць сёмага склікання» падпісаў 16 снежня Аляксандр Лукашэнка.  

«Дата вызначана з улікам устаноўленых законам тэрмінаў на стварэнне тэрытарыяльных выбарчых камісій, падрыхтоўку і правядзенне іншых выбарчых дзеянняў у адпаведнасці з патрабаваннямі Канстытуцыі Рэспублікі Беларусь і Выбарчага кодэкса Рэспублікі Беларусь«, — гаворыцца ў паведамленні.

Цэнтральнай камісіі Беларусі па выбарах і правядзенні рэспубліканскіх рэферэндумаў даручана ў адпаведнасці з яе паўнамоцтвамі арганізаваць правядзенне выбараў у мясцовыя саветы дэпутатаў і ажыццяўляць кантроль за выкананнем заканадаўства аб выбарах.

Дзяржаўныя органы і іншыя дзяржаўныя арганізацыі павінны забяспечыць выкананне ва ўстаноўленыя Выбарчым кодэксам тэрміны аднесеных да іх кампетэнцыі арганізацыйных мерапрыемстваў па падрыхтоўцы і правядзенні выбараў у мясцовыя саветы дэпутатаў.

Фінансаванне выбарчай кампаніі будзе ажыццяўляцца за кошт сродкаў рэспубліканскага бюджэту.