Новости / Общество

Антыкрызісны рэцэпт. Ці заменяць жалуды беларусам каву?

27.10.2011, 12:54 / remove_red_eye 201 / chat_bubble

Са снежня мінулага года кошты на каву і гарбату ў Беларусі выраслі амаль утрая, абагнаўшы па тэмпах росту нават хутка даражэючы алей. Замежныя напоі становяцца для беларусаў сапраўднай раскошай.

З 2010 года кава і гарбата сталі лідарамі па тэмпах росту коштаў. Сёння кошт некаторых папулярных марак меленай кавы вагаецца ад 50 да 70 тысяч рублёў, распушчальная каштуе нават больш. За год кава вырасла ў коштах амаль утрая, абагнаўшы па тэмпах росту кошту нават алей. Хутчэй за гэты напой даражэлі толькі проса і сода.

Яшчэ ў снежні 2010 года – студзені 2011-га прыхільнікі натуральнай кавы маглі набыць 250-грамовы пачак любімага напою па сярэднім кошце 10–11 тысяч рублёў. Банка распушчальнай кавы (100 г) каштавала прыблізна столькі ж.

У верасні гэтага года цэннікі на каву сталі значна цяжэйшымі: 250 г натуральнай кавы ў сярэднім каштавалі 35 тысяч рублёў, 100 г распушчальнай – амаль 25 тысяч.

РЕКЛАМА

Кошты на каву растуль амаль штомесяц. Прычым апошнім часам гэты напой даражэе не на дзясятыя долі адсоткаў, а на 10–20% адразу. Так, напрыклад, у верасні ў параўнанні са жніўнем натуральная кава стала даражэйшай на 11%, распушчальная – амаль на 20%. Прыкладна на столькі ж падаражэла і гарбата.

Шалёныя кошты на каву, якую  закупляюць за валюту, падштурхнулі карэспандэнта «IP» выпрабаваць на сабе напаўзабыты народны рэцэпт жалудовага напою. Менавіта такую эрзац-каву піло насельніцтва Германіі падчас  Другой сусветнай вайны.

Вымушаны эксперымент

Пра жалудовую каву, бадай, хоць раз у жыцці чуў кожны з нас. Чуў кожны, але каштавалі, напэўна, нямногія. А чаму б не пакаштаваць! На жалуды валюта не трэба – штовосень іх лёгка і, галоўнае, абсалютна бясплатна можна назбіраць у любой дуброве.

Увосень дубровы не сціхаюць ад проста ашалелых соек, якія нарыхтоўваюць жалуды сабе на зіму. А яшчэ жалудамі харчуюцца дзікі, мышы, вавёркі, арэшнікавыя соні… Дык хіба пацярпелыя матэрыяльна беларусы горшыя за грызуноў і кабаноў, каб ігнараваць дармавы прадукт пад нагамі? Тым больш касмічны палёт цэнаў сам падштурховае да эксперыменту над сабою ды ўласным арганізмам!

Уся гэта кухня

Такім чынам, эксперыментальнай базай была абрана дуброва графоў Пуслоўскіх у Альбярціне, што пад Слонімам. Балазе жалудоў сёлета там урадзіла багата, нават з лішкам. Ды і на выгляд яны буйныя і выцягнутыя (па форме нагадваюць фінікі) – акурат такі гатунак, калі верыць аматарам жалудовай кавы, найлепш падыходзіць для прыгатавання жалудовага напою. Час для збірання жалудоў цяпер таксама ідэальны – пасля першых замаразкаў.

У Інтэрнэце часта рэкамендуюць перад сушкаю спачатку вымачыць альбо паварыць жалуды 30 – 40 хвілін, каб пазбавіць іх   характэрнай горычы. Аднак вядомы расійскі папулярызатар батанікі Мікалай Вярзілін для вырабу кавы з жалудоў рэкамендуе гэтага не рабіць. Ідзем па шляху найменшага супраціву: прамываем жалуды, раскладаем на бляху і – адразу ў духоўку.

Абабраць дубовыя плады ад шалупіння лепш пасля першае прасушкі: так яны лягчэй палушчацца і падзеляцца на дзве палоўкі. Лепей таксама сушыць жалуды ашчадна, не за адзін раз, а за некалькі падыходаў: 5 – 7 разоў па 30 – 40 хвілін пры тэмпературы 150 – 200 градусаў. Перад кожнай прасушкай жалудовыя палоўкі трэба перасыпаць, каб яны падсмажваліся роўна. Пасля другой ці трэцяй прасушкі палоўкі можна пакалоць на драбнейшыя часткі памерам з кававыя зярняты. Так жалуды хутчэй падсмажацца, а пасля іх будзе лягчэй змалоць.

Вы будзеце назіраць, як вашы жалуды ўсё больш і больш набываюць колер смажанай кавы, а з духоўкі па кватэры разыходзіцца прыемны пах смажаных арэхаў. Знаўцы жалудовай кавы раяць надта не перасмажваць жалуды, а толькі дачакацца, калі яны добра пабурэюць і набудуць хрумсткую кансістэнцыю.

Падрабязнасці для гурманаў

РЕКЛАМА

Працэсы прыгатавання кавы з жалудоў і звычайнае кавы выглядаюць аднолькава. Жалуды трэба змалоць у кавамолцы на парашок і пасля варыць у турцы як натуральную каву. На сярэдні кубачак рэкамендуюць сыпаць 1–2 маленькія лыжкі такога парашку.

Напой, што ў выніку атрымліваецца, на выгляд мала чым адрозніваецца ад звычайнай кавы – мае чорны колер і нават невялікі шумок зверху. А вось розніца ў смаку паміж напоямі з пладоў беларускага дубу і афрыканскага кававага дрэва – прыкладна такая ж, як… паміж Беларуссю і Афрыкай.

Трэба прызнаць, што жалудовая кава – напой для аматараў. Яна мае цьмяны карамельна-арэхавы смак з яскравай ноткай горычы. Варта засцерагчы таксама запарваць яе вельмі моцна. Нават пры самых пазітыўных настройках і неверагоднай пашане да батанікі такі напой п’ецца цяжкавата.

Кардынальна палепшыць смак жалудовай кавы дапамагае лыжка мёду. Некаторыя аматары для паляпшэння смаку рэкамендуюць таксама змешваць дубовы парашок з роўнымі часткамі парашку з падсмажанага зерня ячмяню, жыта, аўса ці карэння цыкорыі. На ўласны густ дадаюць таксама малако і цукар.

Як сцвярджаюць навукоўцы, жалудовы напой вельмі карысны: ён паднімае тонус, дапамагае пры расстройствах страўніка, а таксама пры шматлікіх захворваннях сэрца і мочапалавой сістэмы.

Тры высновы

Для сапраўдных кававых гурманаў: не варта спадзявацца на жалуды, паколькі яны наўрад ці заменяць каву. А таму запасайцеся натуральнаю каваю, пакуль кошты на яе зноў не ўзляцелі.

Для аматараў вострых пачуццяў і забытай нацыянальнай экзотыкі: усё ж паспрабуйце – не пашкадуеце.

Для кабаноў і грызуноў: цешцеся новым ураджаем жалудоў, бо пакуль што беларусы вам не канкурэнты. Пакуль што…

Поделиться:
Читать также
Комментарии

Правила комментирования

comments powered by Disqus
Scroll Up