Новости Интекс-пресс / Культура

Месца славутай Палонкаўскай бітвы застанецца безыменным

4.02.2010, 12:59 / remove_red_eye 98 / chat_bubble

Улады Баранавіцкага раёна не пажадалі ўсталяваць металічную інфармацыйную шыльду на месцы знакамітай Палонкаўскай бітвы, 350-годдзе якой будзе адзначацца сёлета.

Нагадаем, што напрыканцы мінулага года баранавіцкая інтэлігенцыя звярнулася да раённых уладаў з лістом, у якім прасіла добраўпарадкаваць тэрыторыю вакол памятнага камня каля в. Палонка, а на самім помніку павесіць металічную шыльду з надпісам: «Тут 28 чэрвеня 1660 года аб’яднанае беларуска-літоўскае і польскае войска пад кіраўніцтвам гетманаў Паўла Сапегі і Стэфана Чарнецкага здабыло вялікую перамогу над утрая большым войскам маскоўскага ваяводы Івана Хаванскага падчас вайны Расіі і Рэчы Паспалітай абодвух народаў 1654 – 1667 гг.»

Памятны валун на месцы легендарнай бітвы быў усталяваны і асвечаны праваслаўным і каталіцкім святарамі яшчэ ў 1994 годзе. Драўляную шыльду з мемарыяльным тэкстам на ім сябры Баранавіцкай Рады ТБМ усталёўвалі ўжо двойчы, але яе неўзабаве знішчалі вандалы.

Таму напярэдадні 350-годдзя той слаўнай перамогі пад Палонкай сябры ТБМ вырашылі звярнуцца да мясцовых уладаў з просьбай адзначыць векапомнае месца менавіта металічнай шыльдай. На думку старшыні Баранавіцкай Рады ТБМ Віктара Сырыцы, гэта быў бы ўдзячны жэст нашчадкаў, якія памятаюць сваю гісторыю і якія пазбавіліся комплексаў «малодшага брата» ў яе ацэнках.

РЕКЛАМА

Аднак з адказу Баранавіцкага райвыканкама можна зрабіць выснову, што падобнага жэсту зроблена не будзе: «Фінансавыя сродкі на ўсталяванне металічнай пліты з інфармацыяй пра падзеі на гэтым месцы не прадугледжаны ў раённым бюджэце на 2010 год, бо дадзены памятны знак не з’яўляецца помнікам гісторыі і культуры».

Пакуль месца Палонкаўскай бітвы, перамога ў якой мела выключнае значэнне ў беларускай гісторыі, так і застанецца безыменным. Да лепшых часоў.

Темы:
Поделиться:
Читать также
Комментарии

Правила комментирования

comments powered by Disqus
Scroll Up